Су ресурстары және ирригация вице-министрі Аслан Абдраимов Ұлттық су ресурстары ақпараттық жүйесі жұмыс істеп тұрғанын айтты. Ол су объектілері мен инфрақұрылым туралы мәліметтерді біріктіреді, су балансын жүргізеді, суды пайдалануды есепке алады және ғарыштық мониторинг арқылы су қоймаларының жағдайын қадағалайды.
Жүйе Еуразиялық даму банкінің грант қаражаты есебінен құрылған. Онда 17 758 өзен, 3 148 көл, 3 927 мониторингтік ұңғыма және 1 209 гидротехникалық құрылыс туралы деректер көрсетілген. Цифрлық тізілімге 10 мыңнан астам құрылыс паспорты енгізілген және 6 мыңнан астам арнайы су пайдалану есебі қабылданған.
Қаржыландыру және бақылау тапсырмалары
Бектенов өңірлердегі жобалардың іске асырылуы кешігумен жүріп жатқанын атап өтті. Ол әкімдіктерден жергілікті бюджеттерден іс-шараларды қаржыландыруға басымдық беруді және өңірлік бюджеттерді қалыптастыру мен түзету кезінде шығындарды уақтылы көздеуді талап етті. Су ресурстары және ирригация министрлігіне Кешенді жоспардың орындалуын күшейтіп бақылау және қаржыландыру мерзімдері мен көлемін қатаң бақылау тапсырылды.
Цифрландыру және деректерді интеграциялау мерзімдері
Экология және табиғи ресурстар министрлігіне трансшекаралық өзендердегі судың сапасын бақылауды күшейту тапсырылды. Су ресурстары және ирригация министрлігіне әкімдіктермен бірлесіп 2027 жылғы 1 қаңтарға дейін барлық гидротехникалық құрылыстардың паспорттарын жүйеге енгізу, ал 2027 жылғы 10 маусымға дейін елді мекендер шегіндегі су қорғау аймақтары мен белдеулерінің шекараларын белгілеу қажет.
Сондай-ақ экология және су ресурстары министрліктеріне Қоршаған орта жай-күйі туралы ұлттық деректер банкін Ұлттық су ресурстары ақпараттық жүйесімен интеграциялау тапсырылды. Бұл эмиссиялар мониторингі мен өндірістік экологиялық бақылау деректерін автоматты түрде беруге мүмкіндік береді.
Бектенов суды үнемдеу технологияларын енгізуге ерекше назар аударды және бұл мәселе Мемлекет басшысының бақылауында екенін және іске асырудың жоғары қарқынын талап ететінін атап өтті.